Aðalmálstofa kl. 9.00 til 12.00

Stafrænt fullveldi

Hluti okkar daglega lífs byggir á notkun stafrænna kerfa sem flest lúta stjórn erlendra stórfyrirtækja. Þetta á t.d. við um gagnabanka, samskiptaforrit og grunnlíkön gervi­greindar. Erlent eignarhald og yfirráð á stafrænum kerfum geta hins vegar falið í sér takmarkanir á stafrænu fullveldi ríkja þar sem eigendur þeirra geta fyrirvaralaust skert eða lokað fyrir aðgengi notenda og fjar­lægt efni.

 Vegna óvissu í alþjóðamálum hafa fjölmörg Evrópuríki verið að vinna að því að ná fullum yfirráðum yfir stafrænum innviðum sínum undanfarið og er Ísland þeirra á meðal. Í aðgerða­áætlun ríkisstjórnarinnar er fjallað um uppbyggingu gervigreindarinnviða með áherslu á gagnaöryggi og stafrænt fullveldi þar sem tryggja á yfirráð yfir tæknilausnum og mikilvægum gögnum.

 Á aðalmálstofu Lagadagsins 2026 verður fjallað um hugtakið „stafrænt fullveldi“ út frá réttar­öryggi, efnahagslegu öryggi og upplýsingaöryggi og að hverju íslenska ríkið þarf að huga að við innleiðingu gervigreindarlausna. Einnig verður rætt um reglugerð (ESB) 2024/1689 um gervi­greind sem mun leggja sérstakar skyldur á þróunaraðila og þau áhrif sem hún mun hafa.